Það er með ólíkindum hvað ég vanræki þessa heimasíðu mína. Að vísu hefur fókusinn verið á litlu stelpunni minni en ég lofaði að ég myndi taka mig á í orlofinu, og ég ætla að standa við það! Ég fæ mega samviskubit að sjá hversu margir koma hingað daglega og síðan jafn lífleg og gervipottablómið mitt.

Hæ!

B A B Y S H O W E R 

Síðasta sunnudag vaknaði ég eldhress kl. 8 um morguninn og heimtaði að fara í Ikea um leið og það opnaði. Eðlilega þar sem við vorum að kaupa fyrstu framhliðina á eldhúsinnréttinguna. Ég ætlaði svo í sakleysi mínu að koma við í Epal, jafnvel Smáralind og eyða deginum á einhverju flakki um borgina. Þegar að við erum komin á griðarstaðinn minn í Ikea, umbúðarlaust, byrjar Stefán að kvarta og kveina yfir buxunum sem hann er í. Að þær séu of þröngar og að við verðum að fara heim og skipta um buxur. Ég undraðist á því afhverju hann væri búinn að ganga heilan Ikea hring án þess að segja orð um þetta en samþykkti það að við gætum nú farið heim að skipta um föt. Einnig var tengdapabbi mættur uppí íbúð að bardúsast. Ég bið Stefán um að koma við í bakaríi og hann kaupir handa okkur rúnstykki til að eiga. Þegar að við keyrum inn í götuna sé ég bílinn hennar systir minnar og ömmu. Velti mér lítið uppúr því og hugsa með mér að það sé einhverskonar kaffiboð heima. Gatan var stútfull af bílum og blótaði ég fermingunum í sand og ösku. Vitlausari gat ég varla verið.

Þegar að ég opna hurðina heima taka á móti mér vinkonur mínar í óvænt babyshower. Æi. Ég held varla afmælisveislur sjálf því mér finnst það svo pínlegt og hef verið svoleiðis frá því ég var barn. En mikið ofboðslega er þetta skemmtileg hefð. Ég var svo hrærð að ég er ennþá að jafna mig. Í boði voru allskyns leikir, fáránlega góðar veigar og dásamleg samverustund! Ég tala nú ekki um þær ótrúlegu gjafir sem Stefánsdóttir fékk. Skildi mig eftir orðlausa.

Rut systir mín, höfuðpaurinn af þessu öllu saman á stærsta hrós í heimi skilið fyrir undirbúninginn á veislunni.

Ég var svo utan við mig að ég náði ekki að festa myndir á filmu en þetta eru þær sem ég screen shot-taði frá stelpunum og fékk myndir frá systu. Það er með ólíkindum hvað maður á góða að.















Takk fyrir mig!! x

Staðan á framkvæmd á þaki: Það verður farið í þakið um helgina!! Maður lifandi hvað ég er fegin. 

Íbúðarfærslan sem ég lofaði!

Við keyptum þessa íbúð á klink. Kannski ekki nokkra krónupeninga en klink miðað við fasteignabóluna í dag. Hún er líka í Mosfellsbæ, svona u.þ.b. 17 kílómetrum frá því þar sem við vildum upprunarlega vera - í hlíðunum eða einhverstaðar miðsvæðis. Þið þekkið þetta. Sama gamla klausan.

Eftir að hafa legið yfir fasteignavefnum í allt sumar, horft á tugi íbúða fara á yfirboðnu verði fengum við nóg. Við ákváðum að víkka leitina. Nota bene þarna vorum við ekki orðin ólétt og forsendurnar þar af leiðandi allt öðruvísi. Þá vorum við til í 30 fm risíbúð á 30 milljónir. En um leið og við föttuðum að ég væri ólétt breyttust forsendurnar. 3gja herbergja íbúð, í ,,grónu" hverfi. Kræst hvað ég hljóma eins og gömul kona. En þetta er staðreynd. Og ekki leist okkur á blikuna þegar að við föttuðum að við þurftum að stækka við okkur með greiðslumat uppá 26 milljónir. En stundum er ljós í myrkrinu og þar var þessi íbúð. Á skidt og ingeting.



Ég hélt að pabbi væri orðin eitthvað veruleikafirrtur þegar að hann sýndi mér þessa á fasteignavefnum. Hann náði samt að sannfæra mig um að skoða hana sem við gerðum. Íbúðin leit ekkert það illa út, frekar illa lyktandi og með úreltum eldhús- og baðinnréttingum sem við vildum ekki hafa. Húsið er líka gult í þokkabót. Ekki krúttlega gult heldur svona ,,þarf að mála ASAP" gult. Svo er stigi upp að íbúðinni okkar sem þarfnast lagfæringar. Yfir heildina er húsið samt í niðurníslu og það þarf róttækar breytingar til þess að viðhalda því og gera það að flottu húsi.

Íbúðin var samt með sér inngangi, tveimur svefnherbergjum, nóg af bílastæðum, risa garði og sameiginlegum svölum. Sameiginlegar svalir er kannski ekki mest sjarmerandi hlutur sem maður heyrir en þá er allavega það tækifæri að geta hent þvotti út (þegar ég fer að vera eitthvað húsmæðraleg) og jafnvel skella barnavagninum í góðu veðri. Eins var hún 67,5 fermetrar sem er þæginlega stórt fyrir litla fjölskyldu.


Það þarf að gera mikið fyrir hana en við sjáum mikla möguleika í að gera hana flotta. Það þarf að ráðast á garðinn í sumar, klæða húsið og skipta um öll þök (þeim er s.s. skipt í þrennt).

Hérna eru fyrir myndirnar. Haldið ykkur fast.
















Til að upplýsa ykkur í stuttu máli hvað þarf að gera í íbúðinni áður en við flytjum inn:

• Skipta um þak (kom í ljós að þakið var handónýtt og það er að hamla því að við getum flutt inn)
• Taka eldhúsið í gegn (ný innrétting, hiti í gólf)
• Taka baðherbergið í gegn (ný innrétting, flísaleggja, hiti í gólf)
• Skipta um flísar í anddyri
• Stækka baðherbergið/Minnka eldhúsið
• Taka millivegginn í burtu í eldhúsinu
• Mála alla veggi

Næsta færsla verður meira til að sýna ykkur þær framkvæmdir sem eru búnar og eru að eiga sér stað. Eftir að hafa sett þessar myndir hingað inn sé ég það bersýnilega að mig vantar víðlinsu til að sýna ykkur þetta betur og biðst ég velvirðingar á lélegum myndgæðum!

Guffa 

Jú hæ.

Ég er komin hingað aftur. En er þó ekki hætt á Gekkó. Þvert á móti. Ég ákvað bara að bæta þessari síðu við mig því ég hef svo lítið að gera ehm. Samhliða 32 eininga önn. Og 50% vinnu. Og verandi ófrísk. Í framkvæmdum. Þið skiljið. Ekkert að gera hjá mér.

Jú annars vegar ákvað ég að endurvekja þessa síðu vegna þess að við Stefán erum í framkvæmdum. Við keyptum nýlega íbúð í Mosfellsbæ og erum búin að vera grúska í henni síðastliðnu mánuði. Og þar sem ég er veik fyrir "fyrir/eftir" bloggum á íbúðum að þá ákvað ég að leyfa þeim sem hafa áhuga að fylgjast með.

Eins er ég ófrísk og í lok maí bíður mín nýtt og krefjandi hlutverk. Það eru líka svo mikið af kunningjum, frænkum og frændum þarna úti sem maður hittir ekki reglulega sem hafa eflaust gaman af barnamyndum og hamfarasögum af sjálfum mér.

Æ svo veit maður ekki. Ég tek oft svona köst þar sem ég fer að henda einhverju í framkvæmdir og nenni svo ekki að sjá um það í marga mánuði. Þannig að það má búast við því af mér. Eins og staðan er núna finnst mér ég geta sigrað heiminn með þessum tveimur vefsíðum, náminu og vinnunni en einhverntímann þarf maður að forgangsraða og þá fer vefsíðan aftast í goggunarröðina. Til að vera líka kýrskýr þá er ég ekki á höttunum eftir sponsi frá fyrirtækjum og fá vörur í bílförmum heim til mín til að skrifa um. Ég er, eins og alltaf, bara að þessu til þess að gefa ykkur afþreyingarlesefni og gefa mér grundvöll til að tuða um tilgangslausa hluti.

Ferðatips og bloggin verða samt flest öll á Gekkó. Sem er snilldarsíða fyrir ferðalanga. Og ég mæli með fyrir alla með ævintýraþrá. Já ég skrifaði og í byrjun setningar. Sé ekki eftir því.

Enn já. Að óléttunni. Sem kom eins og þruma úr heiðskýru lofti. Það er skemmtileg saga hvernig það kom í ljós. Ég var nefninlega á leiðinni í aðgerð. Kviðholsspeglun heitir það víst. Ég var að láta athuga hvort ég væri með endómítríósu eða legslímsflakk eins og það heitir á góðri íslensku. Veit varla um ógeðfelldara orð en ég læt það liggja á milli hluta. Ég fékk nefninlega smá panic eftir vitundavakninguna sem þeir standa fyrir í marsmánuði um að ég væri ófrjó en einn af fylgikvillum sjúkdómsins er erfiðleikar með að eignast barn. Svo fyrir áhugasama þá hef ég glímt við óbærilega túrverki frá bernsku. Við erum ekkert að tala um ,,fáðu þér einn banana og íbúfen og allt verður í lagi". Nei. Við erum að tala um yfirlið í uppþvottavélina heima, spítalaheimsóknir og frá vinnu alltaf 1x í mánuði útaf verkjum. Ég var að sturlast á þessu og vildi fá svör strax. Þá ákvað kvennsjúkdómalæknirinn minn að framkvæma aðgerð á mér, að þetta gengi ekki lengur að vera svona alla mánuði ársins.

Allavega, ég er mætt niður á Kvennadeild, berrössuð undir slopp og er á leið uppá skurðstofu. Þar er hjúkrunarfræðingur sem spyr mig 380 spurninga og þar á meðal: ,,hvenær voru síðustu blæðingar?" ehh. Ég veit það ekki. Ég man varla hvað ég gerði í síðustu viku. En ég hugsaði mig um og sagði: ,,Tja, í byrjun september - en það gerist alveg að ef ég er stressuð að þá verða þær óreglulegar". Gott og blessað og ég er keyrð uppá skurðstofu og er mætt á stálborðið, skítandi á mig úr hræðslu enda ferlega óvön aðgerðum (sem betur fer!). Kvennsjúkdómalæknirinn minn spjallar við mig og spyr mig að sömu spurningu og hjúkkan og ég svara því sama: ,,æ í byrjun september". Hún sagði að hún myndi nú taka próf til öryggis þegar að ég yrði svæfð en að það gerðist nú aldrei að það væri einhver ólétt 5 mínútum í aðgerð. Ég fæ svo grímu yfir mig og er svo gott sem rotuð og veit ekki betur en ég fari í aðgerðina.

Hálftíma seinna ranka ég við mér fyrir utan skurðstofuna þar sem kvennsinn minn heilsar mér. Þetta var eins og í atriði úr Grey's Anatomy. Allt í móðu og ég gat ekki fókusað á hana. Hún muldrar eitthvað og ég skil ekki orð. Þangað til að hún réttir mér poka með óléttuprófi og það eina sem ég næ er ,,það var engin aðgerð elskan, þú ert ófrísk". Ég, eins og ég hafi verið nývöknuð af heljarinnar djammi, skil ekki neitt - tek óléttuprófið af henni og sofna aftur. Vakna svo þegar að það er verið að keyra mig niður og brosi útaf eyrum. Hringi svo í Stefán og hann heldur að eitthvað vont hafi gerst, enda átti ég að vera í aðgerðinni fram að hádegi. Hann spyr í móðursýkiskasti hvort það sé ekki allt í lagi. Ég sagði honum að hann mætti koma að sækja mig - aðgerðin hefði ekki verið framkvæmd því ég væri ófrísk!

Skiljanlega vorum við bæði í sjokki en við tókum fréttunum afar vel! Erum svo spennt fyrir nýja hlutverkinu og ég get varla ímyndað mér betri verðandi pabba en Stefán.



En eftir að hafa verið að taka síðuna í gegn, veljandi litapallettur og skriftir í þrjá tíma og deila með ykkur alltof miklu í fyrstu færslu ætla ég að segja þetta gott. Það munu koma færslur á næstunni varðandi íbúðina. Ég lofa.

Ykkar Guffa!