1. Plastmotta fyrir eldhúsið - Fæst í Pipar & Salt  || 2. Skýja órói úr Lovliness Butik || 3. String Pocket - Fæst í Epal || 4. Nespresso kaffi vél - Fæst í Elko || 5. Chatboard - Fæst í Epal

Við eigum loksins þak yfir höfuðið á okkur!

Eftir marga vikna bið var spáin fyrir þessari helgi fremur góð og því var ákveðið að slá til og fara í þakið. Ég hélt niðrí mér andanum alla vikuna og dauðóttaðist að það myndi koma vond spá fyrir helgina. En við vorum rosalega heppin og það rigndi aðeins um nóttina. Að öðru leyti var veðrið fullkomið.

Sérsveitin (pabbi, tengdó, Stefán, Grétar frændi, vinir Stefáns og nágrannar) voru mættir eldsnemma í verkið. Það er með ólíkindum hvað margar hendur vinna mikið verk en þeim tókst að klára þetta um tvö leytið.

Ég nældi mér í flensu og var því heima á meðan viðgerðum stóð. Ekki það að flensan hafi stoppað mig alfarið, heldur hefði ég bara verið fyrir ef að ég hefði mætt á svæðið. Ekki ætlaði ég heldur að fara fórna mér uppá þak með 30 vikna bumbuna mína þar sem einn datt niður í íbúð af þakinu. Hann slasaðist sem betur fer ekki mikið!

Ég er svo þakklát fyrir alla hjálpina sem við erum búin að fá í framkvæmdunum. Það er ekki sjálfgefið að fólk nenni að vakna 7:30 á laugardagsmorgni í þakviðgerðir. Takk allir þeir sem lögðu hönd á plóg. Ég hlakka til að bjóða ykkur í köku og kaffi.

Ég fékk að sjálfsögðu að fylgjast með í gegnum Stefán á meðan ég sat heima í tölfræðilærdómi og tilheyrandi veikindum. Má til með að deila því með ykkur:







Núna er búið að taka íbúðina í gegn að innan en hún var í maski eftir allar framkvæmdirnar.  Það þarf að setja upp loftið að innan og mála það ásamt útveggjunum. Loksins sér maður fyrir endann á þessu og ég er farin að pakka meira og meira niður til þess að gera þetta allt saman auðveldara þegar að það kemur að flutningum.

Eftir þakframkvæmdirnar fórum við Stefán í Ikea ferð nr. 423 og keyptum blöndunartæki fyrir eldhúsið og plötu undir þvottavélina (Í umbúðarlaust. Á 65% afslætti. I kid you not!). Tókum svo stutt stopp í Smáralind þar sem ég kemst ekki lengur í nein föt og ákvað að kaupa mér kjól.

Ég hugsa að í næstu framkvæmdarfærslu muni ég sýna ykkur baðherbergið eða forstofuna - fer svona helst eftir því hvort verður tilbúið á undan. Annars mun ég eflaust blogga eitthvað um lífið og tilveruna í næstu færslum.

Og svona smá myndir á persónulegu nótunum þá er ég gengin 30 vikur. Ég trúi ekki að ég eigi bara 10 vikur eftir en ég er búin að vera ofboðslega heppin á þessari meðgöngu en hún hefur gengið lygilega vel. Ég er orðin ferlega spennt að fá dóttir okkar í hendurnar, það verður bara að segjast :-)

B A B Y S H O W E R 

Síðasta sunnudag vaknaði ég eldhress kl. 8 um morguninn og heimtaði að fara í Ikea um leið og það opnaði. Eðlilega þar sem við vorum að kaupa fyrstu framhliðina á eldhúsinnréttinguna. Ég ætlaði svo í sakleysi mínu að koma við í Epal, jafnvel Smáralind og eyða deginum á einhverju flakki um borgina. Þegar að við erum komin á griðarstaðinn minn í Ikea, umbúðarlaust, byrjar Stefán að kvarta og kveina yfir buxunum sem hann er í. Að þær séu of þröngar og að við verðum að fara heim og skipta um buxur. Ég undraðist á því afhverju hann væri búinn að ganga heilan Ikea hring án þess að segja orð um þetta en samþykkti það að við gætum nú farið heim að skipta um föt. Einnig var tengdapabbi mættur uppí íbúð að bardúsast. Ég bið Stefán um að koma við í bakaríi og hann kaupir handa okkur rúnstykki til að eiga. Þegar að við keyrum inn í götuna sé ég bílinn hennar systir minnar og ömmu. Velti mér lítið uppúr því og hugsa með mér að það sé einhverskonar kaffiboð heima. Gatan var stútfull af bílum og blótaði ég fermingunum í sand og ösku. Vitlausari gat ég varla verið.

Þegar að ég opna hurðina heima taka á móti mér vinkonur mínar í óvænt babyshower. Æi. Ég held varla afmælisveislur sjálf því mér finnst það svo pínlegt og hef verið svoleiðis frá því ég var barn. En mikið ofboðslega er þetta skemmtileg hefð. Ég var svo hrærð að ég er ennþá að jafna mig. Í boði voru allskyns leikir, fáránlega góðar veigar og dásamleg samverustund! Ég tala nú ekki um þær ótrúlegu gjafir sem Stefánsdóttir fékk. Skildi mig eftir orðlausa.

Rut systir mín, höfuðpaurinn af þessu öllu saman á stærsta hrós í heimi skilið fyrir undirbúninginn á veislunni.

Ég var svo utan við mig að ég náði ekki að festa myndir á filmu en þetta eru þær sem ég screen shot-taði frá stelpunum og fékk myndir frá systu. Það er með ólíkindum hvað maður á góða að.















Takk fyrir mig!! x

Staðan á framkvæmd á þaki: Það verður farið í þakið um helgina!! Maður lifandi hvað ég er fegin. 

Íbúðarfærslan sem ég lofaði!

Við keyptum þessa íbúð á klink. Kannski ekki nokkra krónupeninga en klink miðað við fasteignabóluna í dag. Hún er líka í Mosfellsbæ, svona u.þ.b. 17 kílómetrum frá því þar sem við vildum upprunarlega vera - í hlíðunum eða einhverstaðar miðsvæðis. Þið þekkið þetta. Sama gamla klausan.

Eftir að hafa legið yfir fasteignavefnum í allt sumar, horft á tugi íbúða fara á yfirboðnu verði fengum við nóg. Við ákváðum að víkka leitina. Nota bene þarna vorum við ekki orðin ólétt og forsendurnar þar af leiðandi allt öðruvísi. Þá vorum við til í 30 fm risíbúð á 30 milljónir. En um leið og við föttuðum að ég væri ólétt breyttust forsendurnar. 3gja herbergja íbúð, í ,,grónu" hverfi. Kræst hvað ég hljóma eins og gömul kona. En þetta er staðreynd. Og ekki leist okkur á blikuna þegar að við föttuðum að við þurftum að stækka við okkur með greiðslumat uppá 26 milljónir. En stundum er ljós í myrkrinu og þar var þessi íbúð. Á skidt og ingeting.



Ég hélt að pabbi væri orðin eitthvað veruleikafirrtur þegar að hann sýndi mér þessa á fasteignavefnum. Hann náði samt að sannfæra mig um að skoða hana sem við gerðum. Íbúðin leit ekkert það illa út, frekar illa lyktandi og með úreltum eldhús- og baðinnréttingum sem við vildum ekki hafa. Húsið er líka gult í þokkabót. Ekki krúttlega gult heldur svona ,,þarf að mála ASAP" gult. Svo er stigi upp að íbúðinni okkar sem þarfnast lagfæringar. Yfir heildina er húsið samt í niðurníslu og það þarf róttækar breytingar til þess að viðhalda því og gera það að flottu húsi.

Íbúðin var samt með sér inngangi, tveimur svefnherbergjum, nóg af bílastæðum, risa garði og sameiginlegum svölum. Sameiginlegar svalir er kannski ekki mest sjarmerandi hlutur sem maður heyrir en þá er allavega það tækifæri að geta hent þvotti út (þegar ég fer að vera eitthvað húsmæðraleg) og jafnvel skella barnavagninum í góðu veðri. Eins var hún 67,5 fermetrar sem er þæginlega stórt fyrir litla fjölskyldu.


Það þarf að gera mikið fyrir hana en við sjáum mikla möguleika í að gera hana flotta. Það þarf að ráðast á garðinn í sumar, klæða húsið og skipta um öll þök (þeim er s.s. skipt í þrennt).

Hérna eru fyrir myndirnar. Haldið ykkur fast.
















Til að upplýsa ykkur í stuttu máli hvað þarf að gera í íbúðinni áður en við flytjum inn:

• Skipta um þak (kom í ljós að þakið var handónýtt og það er að hamla því að við getum flutt inn)
• Taka eldhúsið í gegn (ný innrétting, hiti í gólf)
• Taka baðherbergið í gegn (ný innrétting, flísaleggja, hiti í gólf)
• Skipta um flísar í anddyri
• Stækka baðherbergið/Minnka eldhúsið
• Taka millivegginn í burtu í eldhúsinu
• Mála alla veggi

Næsta færsla verður meira til að sýna ykkur þær framkvæmdir sem eru búnar og eru að eiga sér stað. Eftir að hafa sett þessar myndir hingað inn sé ég það bersýnilega að mig vantar víðlinsu til að sýna ykkur þetta betur og biðst ég velvirðingar á lélegum myndgæðum!

Guffa